Archivseite - Daten nicht mehr aktuellImpressum · Datenschutz
Das WebFO-Projekt war eine private Website über die Stadt Forchheim, die in den Anfangsjahren des WWW entstand. Dieses Archiv zeigt das WebFO zum Stand im Jahr 2005 und dient heute rein historischen Zwecken. Viele Informationen und Links auf diesen Seiten sind daher veraltet und nicht mehr gültig. Für alle gezeigten Bilder wurde von den damaligen Rechteinhabern die Erlaubnis zur Verwendung erteilt.

[WebFO Inhalt] [Hoch] [Zurueck]

*

Annafesd '95 - etzä is ka Annafest mehr

*

Heuer hommä widdä Annafest ghobbd, obä aans mit an großn Fesdzuch, wi bloß alla fünf Johr. Do brauchd dä Obä nu mera Fraibiermargn, di wu vo die Schdoddräd ihr zwaa obzoong wärn.

Oganga is scho om Sammsdooch midn klaana Zuuch. Said longä Zaid is nonni klärd, ob die Räd ned bessä hindäher auf alla vier krieng solln und dä Schützgenerol in aanä Sänfdn voraus droong wärd, oddä die CSU auf schworza Gäul fesdschnalld un die Rodn übähaubsd ned miedgnunmma wärdn. In Radio Andenna Frangn homms vo die Gwiddä gwarnd und gsochd, besonders gfährlich sänn die mid die Hofdn Ordn o di Hühnerbrüsd.

Es Bier wärd alla Johr auswärdiger. Demnächsd wärri an Vorschlooch aibringa: Obere Kellä Görgen-Bräu, underä Kellä Wolfhöher, des Fesd verleeng mä auf an anderen Bärch un grobn neua Löchä. Dänn Wold, olso die ochd Baamä, wu dä Förschdä Taran nu reddn hod könnd, solln di Närnberchä, Erlangä, Laafä, Kinesn, Japanä, Präsidendn und resdlichn Preußn besetzn.

Om erschdn Sunntooch wors wundäboor. Die Stodträd hod a Unimog zoong. Amoll hod dä Woong bremsd, die Wogners-Marri is wi a Kanonakugl gfloong kummä un hindn hod annä "alla neun" gschriea. Obbä es worrn meera. Om Änd sänns rundäkrabbld mid Musklkoodä un die Orm und in die Gsichdsbackn vern Werfn und vern Grinsn.

Der Stumpf, der Waldnfels, der Londrod un nu a poor Großköpfetä sänn in Kutschn dahärkumma. A jedä hod a Steckerla im Hemdsärml ghobbd, dämied na die Händ ned rundäfälld. Bei annä Kutschn hobbi gmaand, do höggn dä Kaiser Franz-Josef und die Maria-Theresia drin, es worrn obbä dä Rainer Herrnleben und die Miß Europa, Wilmya Zimmermann. A schönä Zuch woors. Alla Vereine un Grüppla homm mied gmachd. Dä Haimadvorstond Dieter George, dä Annafesd-Ziegler und die Gäul worrn awäng nervös, homms obbä überlebbd.

A gaanza Wochn hobbi Höhnla un Fesdbier gmischd und hobb än Klann auf die Karusällä ghockd.

Etza is ka Annafest mehr. Die Leud, wu in dä Näh vorn Berch wohna, könna widdä in ihr Häusä nai, die Wird sänn nu bain Bündln vo die Geldschai, die Pferdla vo dä Raidbohn homm zwaa Tooch Urlaub, die Hering vom Karnbaum homms nimmä so worm, bain Massiern triffsd die Annafesdbedienungen, un bain "Glockn-Kellä" hockn widdä die Leud, wu immä dort sänn. Bis auf die poor, die wu an Obstechä zär Kulmbocher Bierwochn machn. Bis nächsdes Johr!

von Siegfried Schubert, NN 03.08.95

*

[WebFO Inhalt] [Hoch] [Zurueck]

*

© 1995-2005 Das WebFO-Team - Alle Rechte vorbehalten